遠藤航「打跛腳」完勝卡些度　高普最神收購

利物浦勇奪英聯盃冠軍，落場球員個個交出100%功課，不過最令球迷印象深刻非日本中場遠藤航莫屬！季前只係利物浦收購「Plan C」嘅遠藤航，滿場飛表現技壓車路士「1億鎊」先生摩西斯卡些度，原來佢仲負傷頂晒120分鐘賽事，完場後要拎枴杖兼着保護靴離場。

高普季前想簽摩西斯卡些度同羅美奧拉維亞，點知2個中場都畀車路士「截胡」，不過世事就係咁奇妙，「紅軍」最後用1,600萬鎊就簽入遠藤航，而佢今季演出超乎想像，更獲選利物浦12月最佳球員。高普早前就曾公開表示「好彩」簽唔到摩西斯卡些度，否則就會錯失遠藤航。

今場遠藤航不惜氣力抗衡車路士中場，尾段更被摩西斯卡些度踢傷足踝，但佢依然頂足120分鐘，高普賽後都覺得不可思議：「遠藤航行去頒獎台嗰段路，係我見過最疲憊嘅雙腳，我的天呀！呢個係乜嘢球員！」遠藤航離開球場嗰陣，被影到要拎住枴杖，左腳亦着上保護靴，暫時未知傷勢有幾嚴重。