估唔到！車路士陣容後生過紅軍「細路仔」

車路士日前喺英聯盃決賽輸畀利物浦，「紅軍」喺加時階段派出多位青年軍上陣，用細路仔寫下捧盃「童」話。不過統計顯示，原來車路士先至係呢場決賽真正「細路」，無論係正選嘅平均年齡，同埋完場嗰陣嘅11名球員，車路士平均年齡都比利物浦更加年輕。

利物浦喺決賽最後時刻，落場球員有5個21歲或以下小將，但有華基爾雲迪積克、路易斯迪亞斯等老大哥帶住，平均年齡係24.1歲。車路士睇落粒粒皆星，但完場陣容都有4個21歲或以下球員(高爾彭馬、馬路古斯圖、馬度基、利維高維爾)，最老嘅尼干古都係得26歲，平均年齡只得22.6歲，比利物浦「細路陣」仲要後生超過1年！

盛傳將被炒魷嘅車路士領隊普捷天奴，亦堅持呢隊「藍戰士」仍然好後生，未來有極大發展潛力：「我哋嘅陣容好後生，所以要繼續相信自己，堅持依家行緊嘅發展計劃，即管睇下未來可以行到咩地步。」