修咸頓硬撼紅軍　靠「盃賽殺手」創奇迹

利物浦捧完英聯盃冠軍之後，將於周四(29日)凌晨英足盃主場對修咸頓，雖然修咸頓只係英冠球隊，但近況不俗，前鋒施古馬拉今屆英足盃更有3球進帳，呢位21歲法國新星曾於上年英聯盃射死曼城，今仗隨時又會製造驚喜。

施古馬拉出生於富有家庭，爸爸係塞內加爾企業家，媽媽係法國電視台主播，佢曾於巴黎聖日耳門青年軍受訓。施古馬拉喺2022年夏天由波爾多加盟修咸頓，曾於上季英超上陣22場，但僅入1球，其後隨球隊降落英冠。

雖然呢位法國U21小國腳今季聯賽只有3球進帳，但佢踢盃賽事特別醒神，今屆英足盃上陣3次入3球，包括上圈重賽主場對屈福特，個人梅開二度，協助球隊大勝3比0。

數到施古馬拉職業生涯代表作一定係上屆英聯盃8強射入1球，協助修咸頓爆冷以2比0擊敗曼城，今場英足盃遇上傷兵滿營嘅利物浦，正係佢發揮「盃賽殺手」角色嘅好機會。