普捷天奴聞魷魚香　車路士又撬「海鷗」教頭

車路士英聯盃決賽飲恨，加上聯賽戰績低落，領隊普捷天奴帥位危危乎，據報雖然普帥同球會仲有1年約，但好大可能教埋今季就被炒，而繼任人選之一係迪薩比，似乎對白禮頓情有獨鍾。

普捷天奴今季執掌車路士帥印，簽約2年加1年優先續約，但首個球季仲未完，英超爭標無望，英聯盃打入決賽但功虧一簣，《每日郵報》、《TEAMtalk》同著名記者斯基拉報道，普捷天奴帥位不穩，會方考慮換帥選項，極可能今季結束被辭退。

斯基拉稱，車路士正關注白禮頓領隊迪薩比，考慮邀請佢來季執教車路士。新班主保利上場後，車路士撬白禮頓領隊早有前科，去年曾經從白禮頓挖走樸達，但因成績太差不足一季解約，迪薩比係樸達離開白禮頓後嘅接任者，現時又被車路士睇中。

《每日郵報》則指，車路士另一人選係士砵亭主帥魯賓艾摩廉，與此同時，利物浦亦視魯賓艾摩廉為斟介沙比阿朗素嘅後備方案。