一個原因　施丹承認最想去意甲搵食

法國名帥施丹2021年離開皇馬後，一直未有教波，佢近日接受傳媒訪問時，表示準備出山，並有興趣執教意甲球隊，因為佢視意大利傳奇教練納比為恩師，盛傳施丹最大機會接手執教祖雲達斯或者拿玻里。

施丹話：「納比當年執教祖雲達斯，並簽入我，佢對我非常信任，揚言我一定會取得成功，事實證明佢所講正確，納比係我遇過嘅最偉大教練。」提到去向時，施丹承認最想去意甲教波：「意甲係一個唔錯選擇，我對意大利充滿興趣。」

由於祖雲達斯、拿玻里好大機會今夏換帥，加上納比教波生涯，曾經執教呢2支勁旅，難怪傳出如果施丹重返意甲，應該會喺祖記同拿玻里之間作出選擇。

另外，德國《圖片報》指拜仁慕尼黑都有意邀請施丹執教，但首選仍然係沙比阿朗素，由於利物浦計劃聘請呢位西班牙少帥，預料兩間球會將展開搶人大戰，難以短期內落實新帥人選，拜仁可能要等到簽沙比阿朗素失敗，先至會斟施丹。