國米派4蛋領先12分　恐怖火力冠絕全歐

國際米蘭周四(29日)凌晨喺意甲繼續「屠殺」，主場4比0大破阿特蘭大，依家喺聯賽拋離第2位嘅祖雲達斯12分，而且進攻火力更加冠絕全歐洲，捧盃似乎冇乜懸念。

踏入2024年後全勝嘅國米，26分鐘由達美安先開紀錄，完半場前拿達路馬天尼斯射成2比0。換邊後國米繼續搶攻，54分鐘拿達路馬天尼斯12碼被撲出，幸費達歷高迪馬高補中，加上大衞法迪斯喺71分鐘錦上添花，國米輕鬆大勝4比0。

國米已連續4輪聯賽入4球，今季26場入67球嘅成績，係國米自1950/51球季後最佳入球紀錄，同時超越利物浦同拜仁慕尼黑(均入63破)，成為今季歐洲5大聯賽入波最多球隊。

雖然喺意甲贏到開巷，不過教練施蒙尼恩沙基仍保持審慎：「我哋踢得好好，而且強勢已經維持超過2季，我哋喺1個月內將積分差距拉大，同樣亦有可能喺短時間內被收窄，唔可以掉以輕心。」