添巴正式復操！阿仙奴傷兵「清零」

喺英超同曼城、利物浦激烈爭逐嘅阿仙奴，喺季尾衝刺前收到好消息，因膝部韌帶撕裂養傷超過半年嘅祖利安添巴，周四(29日)正式復出重投操練，連同日前復操嘅湯馬士柏迪、富安健洋同辛真高，阿仙奴傷兵名單成功「清零」！

22歲嘅荷蘭國腳祖利安添巴，季前加盟後喺聯賽開鑼戰即重傷，直到周四終於回歸操練，領隊阿迪達表示：「佢做得好好，下一步要睇佢點樣融入球隊，仲要睇佢嘅信心同體能狀況，希望佢可以盡快上陣幫助球隊。」

阿仙奴1個月前仲係傷兵滿營，不過加比爾捷西斯同法比奧韋拉喺上場已回歸後備席，據報湯馬士柏迪、富安健洋同辛真高亦已復操，有望喺下周二(5日)凌晨作客錫菲聯復出，令阿仙奴罕有出現「滿血」嘅情況。