普巴藥檢失敗罰停賽4年　生涯玩完

法國球星保羅普巴藥檢失敗案有判決，意大利反禁藥組織Nado宣判，保羅普巴被罰停賽4年，刑期直至2027年9月，刑滿後佢接近35歲，生涯隨時玩完。

普巴今季頭3輪聯賽2次後備上陣，其中開咧戰對烏甸尼斯雖然冇分落場，但賽後被選中進行藥檢，結果發現睾酮指數超標，被祖雲達斯即作出預防性停賽令至今，其經理人辯護稱普巴並非故意違反禁藥條例。

根據Nado規例，球員被驗出睾酮超標，一般標準係停賽2年，如果被證實係故意違規，刑期會增加到4年，普巴今次刑期，被認為係故意違規。

將滿31歲嘅保羅普巴上年夏天由曼聯重返祖雲達斯，但因傷患上季只踢過6場聯賽，而且又捲入同哥哥馬特斯普巴反目鬧劇，普巴報稱曾被哥哥禁錮勒索。去年夏天佢本來有機會轉投沙特聯賽，但佢想喺意甲證明自己，結果出事，仲可能斷送比賽生涯。

保羅普巴回應表示對判決感到震驚及悲傷，堅稱自己無辜，將會提出上訴。