利華古遜同沙比阿朗素達協議　解約金2.1億

沙比阿朗素近日成為利物浦同拜仁慕尼黑爭奪對象，但要解決佢同利華古遜合約先有得傾，據報利華同沙比仔已達成口頭承諾，假如今夏離隊，解約金為2,500萬歐元(約2.1億港元)。

利華古遜同沙比阿朗素合約仲有兩年，至2026年約滿，《德國天空》報道，雙方合約早有解約條款，就係沙比阿朗素3支前球隊利物浦、拜仁慕尼黑或皇家馬德里提出斟介，利華古遜必須放人，但可收取解約金。

利華古遜收取解約金金額，最初報道為1,000萬歐元(約8,500萬港元)，但依家利物浦同拜仁爭奪，加上利華古遜德甲奪冠呼聲高唱入雲，沙比仔身價亦水漲船高，據報雙方近日達成口頭承諾，假如今夏離隊，解約金增加至2,500萬歐元。

如果沙比阿朗素再教利華古遜多1年，至2025年夏天離隊，解約金將減至1,500萬歐元(約1.27億港元)，不過由於利物浦同拜仁今夏肯定換帥，沙比仔今夏離隊機會極高，問題係未決定去邊隊。