洛迪改寫英超不敗紀錄　曼城未來3場定天下

曼城主場3比1擊敗曼聯後，西班牙中場洛迪卡斯簡迪改寫英超歷史，佢已經連續59次為曼城上陣未逢1敗，打破車路士中堅卡維奴保持嘅58場紀錄，成為英超史上最強「不敗男兒」。曼城即將展開爭標「過3關」之旅，洛迪勢必成為關鍵人物。

27歲嘅洛迪係曼城靈魂人物，「藍月亮」今季各項賽事只係輸過3場，而呢3仗咁啱都係洛迪停賽缺陣。自上年2月開始，洛迪已連續59次為曼城上陣未輸過，打破車路士名將卡維奴喺2006年至08年間創下嘅58場紀錄。

曼城贏完打吡戰後，聯賽將會展開爭標過3關之旅，周日(10日)先作客榜首利物浦、之後喺3月31號主場對第3位嘅阿仙奴，第3關係4月4日主場迎戰排第4嘅阿士東維拉，如果可以喺呢3場「前4大戰」過關，衞冕之路將會係一片坦途！