曼聯捱打寫恥辱數據　加拿祖咁樣「解悶」？

曼聯喺「曼市打吡」雖然半場領先，但全場捱打之下最終反輸1比3，曼聯今仗只得26%控球率同3次埋門(1次中龍)，係自2003年有紀錄以嚟，曼聯喺英超第2低射門數字。比賽最後階段更被曼城玩弄於股掌之中，唔知係咪覺得太悶，被換走嘅阿歷真度加拿祖被影到疑似喺後備席「食鼻屎」解悶。

曼聯今場被曼城完全壓倒，名宿堅尼賽後表示：「數據見到曼城係幾咁主宰性，我唔想對曼聯太苛刻，因為曼城實在太勁。喺比賽最後25分鐘，曼聯幾乎連埋波都掂唔到，曼城不斷玩弄佢哋，就好似大人同細路仔踢波一樣。」

阿根廷小將加拿祖喺82分鐘被調離場，鏡頭影住佢坐喺後備席上一臉茫然，用左手「撩」完鼻之後，好自然咁擺落個口品嚐。其實前德國領隊勒夫就以「食鼻屎」見稱，多次被影到喺場邊「開餐」，甚至曾經有美國大學研究話，「食鼻屎」可以增強免疫力添！