C朗連環失機再受辱　艾納斯亞冠盃輸波

周二(5日)凌晨亞冠盃8強首回合，沙特阿拉伯勁旅艾納斯有C朗拿度復出，不過呢位葡萄牙球星表現令人失望，連環失機之餘再被主隊球迷唱「美斯」歌挑釁，艾納斯最終以0比1不敵阿聯酋勁旅艾阿恩。

連續9次上陣都有波入嘅C朗，上場聯賽坐完波監後復出，早段表現積極，曾嘗試倒掛射門但未能成功；艾阿恩企穩陣腳後反攻更入肉，44分鐘由拉謙米突破艾納斯防線射入。

落後下C朗出盡渾身解數，先有窄角度抽射被撲出，53分鐘門前10碼被緊纏下射高，去到80分鐘更有黃金機會，C朗喺小禁區外無人看管下，射門太正被門將擋出。艾納斯喺補時更有拿樸迪開肘打人被逐，最終以0比1飲恨。

C朗早前被球迷唱美斯歌曲挑釁，沉唔住氣做猥褻動作反擊而被罰停賽，今仗佢繼續被艾阿恩球迷唱「美斯」攻擊，不過C朗今次學精咗，半場完結後只係擰住頭咁返更衣室，未有對挑釁做回應。