歐洲足協落實歐聯新玩法　最多要踢17場！

下季歐聯全面改革，除咗由依家嘅32隊增加至36隊外，比賽模式亦有重大轉變。歐洲足協周一(4日)宣布，下季歐聯落實採用「瑞士制聯賽」模式取代分組賽，確保每支參賽球隊最少踢8場，入決賽嘅話最多可能要踢17場。

新嘅聯賽模式下，36隊會喺同一個積分榜競逐，參賽球隊將被分成4個檔次，每隊要同每個檔次內嘅2隊對壘(1主場+1作客)，意味各隊都要進行8場比賽。8輪賽事結束後，聯賽排第1至8名球隊直接晉級16強，第9至24名球隊就可踢附加賽(第9-16名位種子隊)，爭奪另外8個16強席位，至於排25名或以下球隊直接出局。

歐聯新制度解釋影片：https://twitter.com/i/status/1764606719785869424　

淘汰賽開始就會沿用現行制度，如果有球隊要踢附加賽並且最終殺入決賽，合共會有17場歐聯賽事，比起之前胎死腹中嘅歐超聯計劃只係踢少2場。至於歐霸盃同歐協聯同樣會改用「瑞士制聯賽」，但聯賽階段仍然只踢6場。