夏維斯重生創造10球　多過上季總和

阿仙奴上場英超大勝錫菲聯6比0，中場夏維斯射入1球及1次助攻，佢嘅入波亦係英格蘭頂級聯賽史上第15萬個入球，極具歷史意義。呢位24歲德國國腳今季英超已經創造10球，包括射入7球及3次助攻，仲多過上季效力車路士嘅創造入球總和。

夏維斯今季加盟阿仙奴之後，曾於季初各項正式賽事上陣9次，0入球及0助攻，被寸係「009」，幸好佢沉着應戰，表現愈來愈出色，近3次英超上陣都有入波，今季聯賽26次披甲，累積入7球及3次助攻，反觀上季為車路士踢35場聯賽，僅入7球及1次助攻。

夏維斯登陸英超4年以來，單季最多聯賽入波係2021/22年球季入8球，相信今季好大機會可以創新高。