恩莫比尼失機　球迷嬲爆：去沙特退休啦

拉素難得喺歐聯16強首回合擊敗拜仁慕尼黑，但次回合卻大敗出局，首回合入波嘅前鋒恩莫比尼，今仗成為罪人，因為呢位34歲老將上半場有1次入波黃金機會，但佢頂斜出界，為輸波埋下伏線。賽後拉素球迷嬲爆，紛紛喺球會官方社交網留言，指責恩莫比尼，更加有人叫佢轉投沙特阿拉伯球隊「養老」。

當時踢到上半場36分鐘，拉素翼鋒薩卡尼左路傳中，恩莫比尼小禁區內無人看管之下，竟然頂出界，如果呢球入咗，拉素兩回合合計就可以領先2球，最不幸係僅過2分鐘，被拜仁慕尼黑前鋒哈利卡尼頂入。

恩莫比尼失機成為全場比賽轉捩點，難怪拉素球迷非常火滾狠批呢位敗家仔，包括話：「『退休人士』恩莫比尼已經第無數次錯失良機」、「今場波之前，拉素一切都非常好，但恩莫比尼已經老啦」、「恩莫比尼係時候去沙特。」

恩莫比尼效力拉素8年，各項賽事累積射入206球，屬於球隊史上入球王，但近年水準下滑，上季上陣38次僅入14球，今季暫時有10球進帳，會方的確係時候為佢搵接班人。