般費成曼聯「極刑之王」　讓射12碼獲讚揚

曼聯喺周六(9日)英超憑2個12碼入波，主場2比0擊退愛華頓，先開紀錄嘅般奴費南迪斯射入後，更打破荷蘭前鋒雲尼斯達萊紀錄，成為曼聯史上入12碼最多球員，佢之後讓拉舒福特射第2個12碼嘅舉動，亦獲讚有隊長之風。

Opta數據顯示，自般費2020年2月首次為曼聯上陣以來，佢喺聯賽已射入17個12碼，係同期英超No.1，今場入波亦係佢各項賽事為曼聯所入第29個「極刑」，打破雲尼斯達萊28個12碼入波紀錄。般費喺曼聯33次操刀12碼入29球。

般費本來有機會進一步擴大紀錄，但佢將今場第2個12碼讓畀拉舒福特，等佢可以連續2場入波重拾信心，無私表現獲球迷大讚。般費賽後表示：「我同拉舒福特都係劊子手，我問佢有冇興趣操刀，佢話佢有信心。我覺得自己已入1球，拉舒福特都應該可以用12碼拎到入波。」