奇遇記！半場輸0比3　般尼茅夫連入4球反勝

周四(14日)凌晨英超出現「球迷奇遇記」，般尼茅夫主場對盧頓嘅護級大戰，半場盧頓領先3比0情況下，般尼茅夫喺下半場連入4球反敗為勝，成為英超史上第3支半場輸3球仍然獲勝嘅球隊。

今場比賽本來喺上年12月踢，當時盧頓隊長洛克爾比賽期間心臟病發送院，賽事腰斬後今仗重頭再戰，洛克爾亦有到場為隊友打氣。盧頓上半場係威係勢，憑鍾達希、奧賓尼同巴克里入波領先3比0，估唔到下半場形勢大逆轉，蘇蘭基50分鐘追番1球，薩巴尼爾同安東尼施美安喺60同62分鐘閃電建功追成3比3，完場前7分鐘安東尼施美安再入1球，實現奇迹反勝。

般尼茅夫神奇反勝，係繼2001年曼聯(對熱刺)同2003年狼隊(對李斯特城)後，英超史上第3支喺半場落後至少3球，最終反敗為勝嘅球隊。盧領領隊艾華斯賽場後表示：「戰果當然令人痛苦，但我哋唯一可以做嘅係收拾心情，下場對森林非常重要，我哋要盡快振作。」