英格蘭點兵試新人　賓韋特拒絕修夫基徵召

英格蘭今個月將會同巴西、比利時踢2場熱身賽，作為夏天歐國盃決賽周嘅準備，領隊修夫基首次召入愛華頓後防班夫韋迪同紐卡素前鋒安東尼哥頓，艾雲東尼同祖高美斯亦獲重召，不過修夫基就爆料，指阿仙奴右閘賓韋特拒絕國家隊徵召，原因不明。

賓韋特喺2022卡塔爾世盃期間，因私人理由提前退隊，當時有傳佢同英格蘭助教賀蘭特不和，佢之後亦冇再入選國家隊。今季賓韋特狀態大勇，修夫基本來想選佢入伍，但就受到拒絕：「上星期收到伊度(阿仙奴總監)電話，賓韋特唔想被選入國家隊，我覺得好遺憾，佢踢白禮頓嗰陣我已帶佢踢歐國盃，當中一定有原因，但我唔知道詳情，但肯定佢同賀蘭特冇任何問題。」

阿仙奴周四(14日)官方宣布同賓韋特續約到2028年，26歲嘅佢曾經4次代表英格蘭上陣，「三獅兵團」最近2次大賽(20歐國盃、22世盃)，賓韋特都有入選決賽周大軍名單。