曼聯好消息　4大猛將可復出鬥利物浦

曼聯將於周日(17日)晚英足盃8強主場對利物浦，賽前紅魔鬼傳來好消息，領隊坦哈格透露，4位缺陣多時嘅傷兵海倫、美臣蒙特、哈利馬古尼、雲比沙卡已經痊愈，準備就緒，有望出戰今場「雙紅會」。

坦哈格接受傳媒訪問時話：「哈利馬古尼、海倫、雲比沙卡都可以參加團隊操練，有機會上陣，美臣蒙特亦已經復操1星期，有幾日可以完成全課操練，我認為佢哋有望參加對利物浦嘅賽事，當然仲要觀察實際情況，再決定是否派佢哋上陣。」

4位球員之中，以海倫復出對曼聯最重要，佢上月受傷之前嘅6場比賽都取得入球，若然呢位前鋒能夠出戰利物浦，將可以提升紅魔鬼勝算。至於中堅哈利馬古尼今季表現大勇，有番佢助陣，曼聯防線更為穩固。

此外，右閘雲比沙卡復出，可以解決曼聯邊線防守人腳荒，屆時達洛治可以移去左閘，唔需要再由中堅域陀連迪路夫客串左後衞。