意大利公布名單　兩米巨人射手首次入選

意大利國家隊主帥史巴列堤公布新一期大軍名單，並徵召3位新面孔，當中以烏甸尼斯前鋒羅倫素盧卡入選最受關注，呢位身高兩米嘅巨人射手制空力強，被視為史巴列堤改造鋒線嘅「秘密武器」。

意大利將飛去美國集訓踢2場熱身賽，分別於3月22日凌晨對委內瑞拉，以及3日後對厄瓜多爾。史巴列堤趁機試用新人，烏甸尼斯前鋒羅倫素盧卡、維羅納中場科羅倫索、拖連奴右後衞比拿路華首次入選。

23歲嘅羅倫素盧卡被視為意軍鋒線新希望，呢位新星身材高大，被指踢法似意大利2006年世界盃冠軍功臣東尼，佢上場意甲入波協助烏甸尼斯擊敗拉素，今季聯賽有7球進帳。

意大利近年缺乏可靠射手，甚至要搵阿根廷前鋒列迪古歸化幫拖，加上34歲老將恩莫比尼狀態大不如前，落選今次名單，羅倫素盧卡被寄予厚望。