曼聯射手海倫及時復出 硬撼沙拿領銜利物浦3叉戟
2024年03月17日 17:25
東網電視
更多新聞短片
英足盃8強，曼聯主場硬撼利物浦。
周日（17日）晚英足盃8強上演「雙紅會」，曼聯主場火併利物浦。曼聯今季爭冠目標剩番英足盃，不容有失，今仗有養傷多時嘅射手海倫及時復出，拍住拉舒福特同中場般奴費南迪斯攻堅，不過力爭4冠王嘅利物浦，亦有王牌穆罕默德沙拿擔正，與達雲紐尼斯同路易斯迪亞斯組成3叉戟，隨時鬥攻。（無綫myTV Super周日晚11時30分直播）
曼聯正選陣容
24奧拿拿
20達洛治 19華拉尼 2域陀連迪路夫 29雲比沙卡
37馬恩奧 39麥湯米尼
17阿歷真度加拿祖 8般奴費南迪斯 10拉舒福特
11海倫
利物浦正選陣容
62基拿靴
2祖高美斯 78查洛爾昆沙 4華基爾雲迪積克 26安德魯羅拔臣
10阿歷斯麥亞里士打 3遠藤航 8蘇保斯拉爾
11穆罕默德沙拿 9達雲紐尼斯 7路易斯迪亞斯
英足盃8強上演「雙紅會」，曼聯主場硬撼利物浦。「紅魔鬼」踏入2024年後成績確實有改善，但實力同爭標勁旅仲有段距離，主場亦難佔甜頭。利物浦近期士氣爆晒燈，加上雙方近6次正式賽事法定時間交鋒，利物浦獲4勝1和1負，客勝值博。（無綫myTV Super周日晚11時30分直播）
曼聯喺1月底曾經反彈，當時憑大勇嘅海倫頻頻入波，踢出5連勝走勢，不過自從呢位丹麥國腳受傷後，成績又打回原形，包括英超主場不敵富咸，及後同市打吡以1比3輸畀曼城，上場主場對住護級球隊愛華頓，都係靠兩個12碼先贏波。雖然據報海倫今場有機會復出，但佢始終缺陣咗近一個月，就算落得場狀態都成疑，曼聯旨意近況低迷嘅拉舒福特喺前面掛帥，恐怕難以攻破利物浦大門。
利物浦傷兵問題仲未完全解決，艾利臣比加及迪亞高祖達等主力仍有傷在身，但早前榜首大戰照樣打和曼城1比1，為衝擊4冠送別季尾離隊嘅主帥高普，球員士氣極度高昂，更何況穆罕默德沙拿傷愈復出，近期連番後備上陣都交到貨，上場歐霸盃重返正選，即刻射入1球及3度助攻，助球隊大炒布拉格斯巴達6比1，強勢晉級8強。
原來呢位埃及神鋒堪稱「屠魔」高手，近7次正式賽事鬥曼聯，狂轟11粒，「紅魔」守將對住佢都怕怕，拍檔達雲紐尼斯近期亦着晒火，配合中場蘇保斯拉爾等重炮，足以攻陷曼聯脆弱防線，一於撐利記反客為主。
更多賠率：