曼城「雙殺」喜鵲？1億鎊買斷古馬雷斯

曼城喺英足盃8強淘汰紐卡素，贏波之外仲想搶埋「喜鵲」靈魂般奴古馬雷斯！據西班牙《阿斯報》報道，般奴古馬雷斯合約內有1億鎊(約10億港元)買斷條款，曼城已經同該巴西國腳嘅代表進行接觸，準備夏天迎接呢位全能中場加盟。

26歲嘅般奴古馬雷斯喺季初同紐卡素續約至2028年，但就加入價值1億鎊嘅買斷條款，喺現今呢個「中場市況」，1億鎊轉會費對般奴古馬雷斯嘅級數實屬合理價格，佢為紐卡素上陣96場，入過13球同交13次助攻，被譽為英超最佳中場之一。

曼城夏天目標係收購中場，般奴古馬雷斯被列為頭號獵物，Plan B就有甘美治同杜格拉斯雷斯，領隊哥迪奧拿早前亦公開大讚般奴古馬雷斯：「出類拔萃嘅中場，用波冷靜，而且好有侵略性，好肯定佢係紐卡素發展嘅核心。」除曼城之外，據報利物浦同車路士都密切注視，曼城搶人要先下手為強。