中國新帥重用歸化兵　艾克森「5分鐘」夠殺

中國喺亞洲盃分組賽出局後，教練亞歷山大‧揚科維奇被炒魷，改由克羅地亞名帥艾雲高域領軍，今月世盃外首次點兵，歸化兵團重新獲得重用，35歲老將前鋒艾克森亦獲重召，艾雲高域直指艾克森就算唔夠體力踢全場，「5分鐘」都已經夠殺。

亞歷山大‧揚科維奇執教期間，歸化兵未受重用，不過艾雲高域就完全相反，35歲嘅艾克森只係啱啱傷愈，已經即刻入選，嚟緊兩戰新加坡亦未知踢唔踢到，艾雲高域表示：「可能艾克森已經冇場場踢90分鐘嘅體力，但我相信佢只要上陣5分鐘或10分鐘，已經可以為球隊產生積極作用，佢在陣對中國意義重大。」

除咗艾克森之外，費南多同蔣光太亦都得到徵召。中國依家喺C組1勝1負，周四(21日)會作客新加坡，下周二(26日)返主場再鬥多次。