入波開齋兼獲狂牛補選　古古列拿人品大爆發

古古列拿近日運氣滿瀉，在英足盃車路士淘汰李斯特城一仗取得「士哥」，係佢加盟車路士以來首個入球，同時今期國際賽佢又獲西班牙補選，近3年來再獲徵召。

25歲嘅古古列拿雖屬巴塞隆拿出身，但從未上陣，出道早年經歷亦平淡，直至2022年夏天突然被車路士睇中，以6,500萬歐元(約5.5億港元)天價羅致，不過「上車」後表現平庸，上陣機會亦唔多，直至上場對李斯特城開賽早段建功，加盟車路士接近兩年之後，終於取得「開齋」入球。

另邊廂，古古列拿於2021年曾入選西班牙1次，之後冇再入選，但近日由於華倫西亞嘅荷西加耶受傷退出，領隊富安迪補選佢入伍，嚟緊將會為西班牙應付哥倫比亞同巴西兩場熱身賽。