17歲「小將」身份獲肯定　停賽令解除

喀麥隆近年經常爆出球員「年齡造假」醜聞，今年初非國盃，17歲小將杜亞拉就因為外表太成熟，被質疑「報細數」，喀麥隆足總之後對62名懷疑「年齡造假」嘅球員停賽，杜亞拉亦係其中之一。不過最近杜亞拉嘅身份獲證實，停賽令被解除。

據《GFNF》網站報道，效力喀麥隆球會維多利亞聯嘅中場杜亞拉，已獲足總認證身份，佢係喺2006年5月15日出生，仲有2個月先夠17歲，佢已獲喀麥隆足總解除停賽令，將來有望再度入選國家隊。杜亞拉係年初非國盃最年輕球員，但喺賽事中未有上陣。

喀麥隆記者透露，「年齡造假」喺當地球圈非常普遍，因為多數歐洲球探都會考察17、18歲嘅潛力新人，如果球員過咗18歲仍未獲歐洲球會垂青，好大機會唔會再得到外流機會。