獲加、東尼戴鑽石耳環練波被炮轟

被視為今夏歐國盃奪標熱門嘅英格蘭，近日正積極準備對巴西同比利時2場熱身賽，不過基爾獲加同艾雲東尼被影到戴住鑽石耳環練波，就被炮轟似「做騷」多過認真備戰。

基爾獲加同艾雲東尼練波相片曝光後，前英格蘭國腳祖爾巴頓網上炮轟：「啲文化錯晒，着住Leggings同戴鑽石耳環去練波，英格蘭乜嘢都唔會贏到！國家隊有太多軟弱同唔誠實嘅人領導，佢哋想學做嗰啲明星多過想做卜比摩亞。」

不過，唔少網民就反駁祖爾巴頓，指佢睇死英格蘭嘅原因相當唔合理：「你話基爾獲加戴鑽石耳環所以拎唔到冠軍？基爾獲加啱啱先拎歐聯冠軍、個人第5次英超冠軍同第2次英足盃冠軍，你(祖爾巴頓)只係拎過英冠聯賽冠軍咋！」