西班牙啟動保護兒童機制　訓練多限制

西班牙正備戰對哥倫比亞同巴西2場熱身賽，球隊今次召入唔少新人，包括16歲嘅耶馬同17歲嘅古巴斯，由於佢哋都未成年，據報西班牙要啟動「保護兒童機制」，唔單止要向警方申請，訓練期間仲有好多守則需要遵循。

據《馬卡報》報道，西班牙國家隊需要事先向警方申請，同2位未成年球員工作，而且仲有多項保護兒童條例要跟，例如每次外出都要得到家長同意，亦要提交詳細行程表畀家長同球會，交通工具上需要有成人陪同。喺國家隊之內，耶馬同古巴斯被禁止單獨同成年人共處一室，所去地方都要有至少2名成人在場，確保唔會受到欺凌、性侵等問題，另外仲要安排時間畀佢哋做功課同完成學校課程。

耶馬同古巴斯今季喺巴塞隆拿表現出色，據報西班牙足總有意搵佢哋踢歐國盃之外，仲想2人出戰巴黎奧運，巴塞隆拿總監迪高表示：「我哋一定反對耶馬同古巴斯踢晒歐國盃同奧運，足總知道巴塞隆拿嘅立場，我哋會再同球員傾呢個問題。」