PSG撬路易斯迪亞斯　利物浦點回應？

巴黎聖日耳門(PSG)今夏將有基利安麥巴比約滿離隊，球隊組軍方針亦將大變，改走實用路線，據報道佢哋睇中利物浦哥倫比亞前鋒路易斯迪亞斯，將會打「感情牌」全力拉攏，利物浦今夏換帥後亦將進入新時代，令球員去留充滿變數。

《FootMercato》報道，PSG管理層將27歲嘅路易斯迪亞斯視作基利安麥巴比離隊後重心人物，並打算出動球會體育總監軒歷基打「感情牌」，靠佢同路易斯迪亞斯經理人達哥斯達曾於波圖共事嘅關係，希望達成交易。

路易斯迪亞斯同利物浦合約到2027年約滿，原則上可以唔放人，不過紅軍今夏將會改朝換代，高普離隊，新帥人選未定，而另一射手穆罕默德沙拿據報鐵定轉投沙特，不過前鋒線上仲有達雲紐尼斯、加普、迪亞高祖達3大射手，利物浦仲需唔需要養咁多前鋒，好視乎下任領隊戰術安排。