歐國附3場決賽出爐　烏克蘭戲劇性晉級

周五(22日)凌晨歐國盃外圍賽附加賽，3場決賽戲碼全部出爐，包括A線威爾斯對波蘭、B線烏克蘭對冰島同埋C線格魯吉亞對希臘。4強賽事出現多場大勝，唯獨烏克蘭贏得最驚險，佢哋要喺最後5分連入2球，戲劇性2比1反勝波斯尼亞晉級。

作客嘅烏克蘭今場踢得被動，半場同波斯尼亞悶和0比0，57分鐘更由米高拿馬特維恩高擺烏龍落後。烏克蘭失守後大反擊，85分鐘由耶梅卓克接應傳中撞射追平，3分鐘後耶梅卓克轉做助攻，傳中畀杜夫比克頂入致勝球，協助烏克蘭2比1反勝入決賽，將同冰島爭奪決賽周資格。

多場附加賽出現一面倒賽果，A線波蘭5比1大炒愛沙尼亞、威爾斯就4比1大勝芬蘭；至於C線希臘主場5比0炒哈薩克、格魯吉亞2比0輕取盧森堡。3場決賽將喺下周三(27日)凌晨上演，爭奪最後3張決賽周入場券，歐國盃24路大軍亦會全部齊集。