葡萄牙半力照炒瑞典　般奴費南迪斯1傳1射

歐國盃爭標熱門葡萄牙，周五(22日)凌晨熱身賽喺C朗拿度等多名主力休息下，憑般奴費南迪斯交出1射1傳，主場照樣5比2大破瑞典，盡顯雄厚實力。

葡萄牙今個國際賽期會同瑞典、斯洛文尼亞踢熱身賽，領隊馬天尼斯早宣布C朗、迪亞高祖達、祖奧菲歷斯、祖奧簡斯路等8將會喺首戰休息，不過葡萄牙陣容鼎盛，今仗迎戰瑞典游刃有餘。

拉菲爾利亞奧24分鐘先開紀錄，33分鐘2名曼城球員合作，貝拿度施華助攻馬菲奧斯紐尼斯射成2比0，般奴費南迪斯完半場前亦建一功。下半場般費助攻阿文度布馬入波，雖然基奧基尼斯為瑞典破蛋，但干卡路拉莫斯61分鐘反擊入波射成5比1，瑞典完場前追多1球，葡萄牙仍以5比2大勝。

馬天尼斯賽後表示：「今場係好重要嘅測試，我好鍾意今仗一啲新嘅組合，球員都好認真同投入，不過有部份戰術仍然需要加強同改善。」