李斯特城被控財務違規　爭升班唔受影響？

繼愛華頓同諾定咸森林因違反「盈利及可持續發展條例」，分別被扣6分同4分後，依家排英冠次席嘅李斯特城，周四(21日)亦被英超賽會提出同樣指控，不過消息指就算李斯特城被罰扣分，都好大機會唔會喺今季執行，唔會影響佢哋爭升班嘅機會。

李斯特城涉嫌喺對上3個球季，虧損超過英超1.05億鎊上限，資料顯示李斯特城喺21/22球季勁蝕9,250萬鎊，雖然22/23球季財政政報告仍未公開，但球會喺呢季降班，預料亦會錄得嚴重虧損。李斯特城聲明表示對英超賽會檢控感驚訝同失望，將會就指控作出辯護。

李斯特城依家同榜首列斯聯同得82分，領先第3嘅葉士域治1分兼踢少1場，有機會拎到前2名直接升班位置，但如果今次被扣分，肯定會打擊佢哋重返英超機會。據英國《每日郵報》報道，由於李斯特城依家並唔屬於英超球隊，而且距離球季完結時間無多，李斯特城就算被罰，都好可能會係下季嘅事。