車路士輸到傻咗　今夏打包莫迪歷卻奧斯

車路士新班主保利入主初期大手買入年輕球星，但經過接近兩個球季，隊波仲係砌唔掂，有報道指保利可能改變策略，改簽老將，打算打包簽入兩位皇馬元老級球員莫迪歷同卻奧斯。

《每日體育報》報道，保利入主車路士以來，總共簽入34名球員，但無論佢簽咩人，隊波都係打唔出成績，年輕球星唔得，保利就想搵老將試吓，而現成就有皇馬兩位老牌中場莫迪歷同卻奧斯可以出手。

38歲嘅莫迪歷今夏肯定離隊，而傳聞佢件皇馬10號波衫，將會交畀即將加盟嘅基利安麥巴比，至於莫迪歷離隊後會有咩動向仲未清楚，據報沙特向佢招手，但如果車路士有所行動，莫迪歷或者願意留喺歐洲。

至於34歲嘅卻奧斯，現時只係同皇馬逐年簽約，今夏約滿後回復自由身，雖然有消息指皇馬希望同佢延長合約多1年，但雙方仲未落實，車路士若然出手，仲一次過簽埋莫迪歷，卻奧斯可能會答應。