今夏外借期滿後　辛祖綠木齊脫魔

兩位正外借到多蒙特同基達菲嘅曼聯球員，查頓辛祖同格連活特，據報今夏將被正式出售，多蒙特正同曼聯商討買斷條件，而格連活特借用期滿後不會續借，而係高價出售。

《泰晤士報》報道，查頓辛祖季初同坦哈格不和，被踢出一隊操練，甚至不准進入飯堂，查頓辛祖拒絕低頭，最終被外借重返母會多蒙特，據觀察查頓辛祖重投「蜜蜂兵團」後重拾踢波樂趣，不但戒除遲到陋習，性格亦變得隨和，肯主動同球迷簽名，又耐心接受記者提問。

據報多蒙特希望以3,000萬鎊(約3億港元)買斷查頓辛祖，雖然價錢只及3年前曼聯收購價6,000萬鎊嘅一半，但都會努力嘗試，如果曼聯搵唔到更好買家，就會答應多蒙特。

《太陽報》報道，曼聯將會拒絕基達菲續借要求，今夏借用期滿後，將會接受各隊報價，希望將格連活特高價出售。

曼聯新股東拉特克利夫早前透露，未為格連活特歸隊關上大門。不過面對群眾壓力，格連活特重返曼聯機會甚微，「拉爵」最終都要接受將「綠木」出售現實。