利辛度提早返回曼聯　有望復出鬥賓福特

正在養傷嘅曼聯中堅利辛度馬天尼斯早前仍然被阿根廷主帥史卡朗尼徵召入國家隊，根據英國《每日郵報》報道，利辛度馬天尼斯已決定提早於周六(23日)離開國家隊大營，返回曼聯進行操練，爭取3月31日凌晨英超復出，作客對賓福特。

利辛度馬天尼斯2月初對韋斯咸，整傷膝部之後，一直缺陣，由於傷勢已經無大礙，所以有份入選阿根廷大軍名單，備戰熱身賽對薩爾瓦多、哥斯達黎加。據悉利辛度馬天尼斯今次國家隊之行，純粹參與簡單訓練，同隊友磨合及了解史卡朗尼最新部署，並冇打算上陣，所以獲準提早離隊，返回紅魔鬼，備戰英超賽事。

曼聯3位球員哈利馬古尼、雲比沙卡、美臣蒙特上仗英足盃對利物浦已經復出，加上利辛度馬天尼斯亦準備就緒，人腳愈來愈完整。