美斯缺陣　阿根廷照炒薩爾瓦多

周六(23日)早上國際熱身賽，阿根廷即使缺少因傷退隊嘅球王美斯，仍以3比0大勝薩爾瓦多，不過射手拿達路馬天尼斯表現令人失望，今仗又食白果，創下連續15場國家隊賽事0入球恥辱紀錄，睇來呢位國際米蘭前鋒未夠班接替美斯，撐起阿根廷鋒線。

由於兩隊實力相距懸殊，開賽16分鐘，阿根廷就打開紀錄，迪馬利亞開出角球，由中堅基斯甸羅美路頂入，臨完上半場，中場安素費南迪斯把握門前混戰，射成2比0。換邊之後，盧施素亦建一功，換言之，阿根廷3位入波球員都來自倫敦球會。

至於原本被寄予厚望嘅前鋒拿達路馬天尼斯今仗踢足全場，雖然貢獻1次助攻，但始終未能打破國家隊入球荒，佢對上一次為阿根廷入波，已經係2022年9月熱身賽對洪都拉斯，自此之後近15次為國家隊上陣都食白果，同佢今季為國際米蘭上陣37場入26球嘅表現判若兩人，預料下周三(27日)熱身賽對哥斯達黎加，領隊史卡朗尼應該會用祖利安艾華利斯取代拿達路馬天尼斯嘅正選位置。