賽馬會菁英盃　生涯首度起孖　于楊：多謝Chino

東方周六（23日）在「賽馬會菁英盃」A組分組賽，以5比0大勝深水埗，其中下半場後備入替的于楊職業生涯首次梅開二度，演出令人深刻，他盼望繼續有出色發揮，報答球隊主教練盧比度（Chino）的信任。

曾經效力冠忠南區和傑志，又曾短暫投效英格蘭低組別聯賽球隊Dorchester Town的于楊，在今年1月轉投東方，到今場終於首度在職業賽場單場攻入兩球，本季各項賽事暫時錄得3個入球，他對球隊主教練盧比度願意給予自己機會，十分感激：「其實之前喺其他球隊冇乜上陣機會嘅時候，Chino都有叫我畀心機，好開心今次由英國返嚟之後，佢肯畀機會我踢東方，希望可以入多啲波，回報球隊同Chino嘅信任。」

東方是役大勝後，已完成本季「賽馬會菁英盃」征途，不過于楊有信心能夠在聯賽和「足總盃」爭取上陣機會，助球隊取得佳績：「前幾年上陣機會唔算好多，但喺呢度踢咗幾場之後，開始建立到信心，所以我會更加努力練波，幫球隊喺聯賽同『足總盃』攞到好成績。」