再有神鋒戰轉美職　基奧特將投FC洛杉磯

繼阿根廷球王美斯之後，又有1位著名射手即將登陸美職，就係基奧特，根據《ESPN》爆料，呢位37歲老將等今夏約滿後，就會離開AC米蘭，以自由身加盟美職球隊FC洛杉磯，同昔日國家隊隊友門將洛里斯拍住上。

據悉FC洛杉磯方面已經同基奧特接觸咗幾星期，雙方非常接近達成協議，基奧特亦樂意去美職接受新逃戰。由於FC洛杉磯希望基奧特盡快為球隊披甲，預料佢唔會以超齡球員身份，為法國出戰巴黎奧運男足球賽事，同埋亦會喺今屆歐國盃結束後退出國家隊，專注球會賽事。基奧特今季為AC米蘭踢26場意甲，射入12球，仍然寶刀未老。

FC洛杉磯近年簽入唔少球星，包括前皇馬翼鋒加里夫巴利，雖然呢位威爾斯名將只係效力咗半年，但仍然協助球隊奪得2022年美職總冠軍。另外，FC洛杉磯上年12月底宣布簽入熱刺門將洛里斯，佢同基奧特曾於法國國家隊合作多年，包括一齊捧2018年世界盃冠軍，兩人再次並肩作戰，或者可以為FC洛杉磯帶來錦標。