罪人變英雄　佐真奴已獲意大利球迷原諒

意大利中場佐真奴上屆世界盃外圍賽2次對瑞士，都射失關鍵性12碼，成為球隊未能打入決賽周嘅罪人，國家隊前途一度亮起紅燈。不過，呢位32歲老將捱過低潮，近期愈戰愈勇，上場熱身賽後備上陣，貢獻助攻幫意大利以2比1擊敗委內瑞拉，表現備受好評，有望重奪正選位置。

史巴列堤上年9月成為意大利主帥後，佐真奴淪為後備，唔少輿論認為史帥應該棄用呢位巴西歸化兵，引入更多新血。不過，佐真奴以行動證明自己仍然可以為國家隊作出重要貢獻，上場對委內瑞拉，意大利攻勢顯得鼠拉龜，無從入手，佐真奴65分鐘後備上陣，令球隊組織力大為改善，並作出1次妙傳，由列迪古射入致勝1球。

佐真奴該仗踢咗25分鐘，已有16次傳送，賽後獲意大利傳媒一面倒激讚，認為佢屬於意大利最關鍵球員，表現遠勝踢正選嘅文路爾盧卡迪利。事實上，佐真奴今季喺阿仙奴有出色發揮，唔少意大利球迷認為「藍衣兵團」要衞冕歐國盃，佢將擔當重要角色，應該復任正選。