沙比最後揀拜仁　利物浦大鑊

拜仁同利物浦之間嘅沙比阿朗素爭奪戰似乎已有結果，據報沙比同拜仁已非常接近達成協議，最快今夏接掌拜仁教鞭，利物浦要準備另外物色新帥。

《德國天空體育》報道，沙比阿朗素非常接近同拜仁達成協議，雖然利華古遜不願放人，但礙於沙比合約中有「離隊條款」，3支前球隊利物浦、拜仁同皇馬斟介就必須放人，利華古遜可收取解約金，並將解約金定為2,500萬歐元(約2.1億港元)。

來自利華古遜高層消息，球隊今季仍保持不敗，沙比阿朗素正衝擊德甲、德盃及歐霸盃三冠王，事成後如果離隊，唯一去處就係拜仁。分析指沙比選擇拜仁係聰明做法，因為拜仁實力雄厚，但經歷動盪，沙比以拉雜成軍嘅利華古遜仍能力壓拜仁，過檔拜仁後可順利交接，要喺一隊獨大嘅德甲攞好成績亦相對輕鬆，反之接手高普留低嘅利物浦，壓力非常大，加上英超競爭激烈，爭取好成績極其困難。

如果沙比選擇拜仁，一直以沙比為首選嘅利物浦將陷入困境，「紅軍」暫時搵唔到接手高普嘅更好人選，球隊更可能要退出爭標行列一段時間。