上陣6場0貢獻　法蘭克福拒絕買斷雲迪碧克

季中外借到法蘭克福嘅曼聯中場雲迪碧克，由於表現持續低迷，已被剔出球隊計劃一部分，外借期滿後將被送返曼聯。

《圖片報》報道，雲迪碧克今年1月外借到法蘭克福，球隊對佢有所期望，加盟頭3場都獲派上陣，擔任進攻中場，不過呢位荷蘭中場表現未達預期，上陣機會被逐漸壓縮，至今僅為法蘭克福上陣6場0貢獻，而且從未踢足全場。

雲迪碧克外借合約中有850萬鎊(約8,500萬港元)買斷條款，不過法蘭克福無意啟動，今季結束後將被送返曼聯。

雲迪碧克2020年由阿積士過檔曼聯，轉會費高達3,500萬鎊，雲迪碧克自始跌落深淵，4年來都不獲重用，更失去國家隊位置，無論外借愛華頓定法蘭克福，其足球生涯都見唔到轉機，26歲仔已經淪為廢人。