哈利馬古尼：有幾百萬人支持我

哈利馬古尼今季被褫奪曼聯隊長一職，足球事業不跌反升，上陣機會增加，最近喺英足盃「雙紅會」擊敗死敵利物浦，國家隊方面更深獲修夫基信任，哈利馬古尼表示：「雖然好多人質疑我，但仲有幾百萬人支持緊我。」

對於自己經常成為箭靶，哈利馬古尼咁樣解釋：「我喺李斯特城都唔係場場踢得好，有時踢幾場好波，但有時又會踢得差，球迷都會接受，但如果換咗喺曼聯，情況就唔同晒。」

「有好多攝影機影住，外界會對我每個失誤詳細分析同嚴格審視，因為呢度係曼聯，而喺英格蘭情況亦相同，如果過唔到呢關就會被擊潰，呢啲事碧咸同朗尼都曾經遇過，而佢哋係英格蘭最偉大球員之一。」

「雖然有好多人質疑我，話我唔應該入選英格蘭，但亦都有幾百萬人支持我入選。」