基爾獲加受傷離場　曼城噩耗！

英格蘭喺熱身賽主場輸畀巴西，不過對曼城球迷嚟講，基爾獲加喺19分鐘受傷離場先係最大打擊。據報呢位33歲鐵閘懷疑腿筋受傷，下周日(31日)英超大戰阿仙奴上陣成疑。

由於哈利卡尼因傷缺陣，基爾獲加今仗擔任英格蘭隊長，比賽早段佢就成功護空門，但解圍嗰陣疑似整傷腿筋，要離場接受軍醫治理。基爾獲加喺場邊嘗試加速跑步，希望可以繼續比賽，但佢重返球場踢多幾分鐘，就示意需要換人，由安斯干沙代替。

英格蘭周三(27日)凌晨對比利時，基爾獲加好大機會缺陣，更重要係下周日曼城主場對阿仙奴嘅大戰，基爾獲加今季只係缺席過2場聯賽，係曼城防線核心人物。英格蘭領隊修夫基賽後表示：「我哋未知基爾獲加嘅傷勢嚴唔嚴重，因為佢冇乜受傷經驗，所以佢都唔清楚只係大腿繃緊定係有其他嚴重問題，要等詳細檢查。」