艾歷臣最後1戰　圓執教利物浦夢：我哭了！

今年1月宣布患上胰腺癌、只剩最多1年壽命嘅前英格蘭領隊艾歷臣，周六(23日)帶領利物浦傳奇喺晏菲路踢慈善賽，以4比2反勝阿積士。賽前表示執教利物浦係畢生心願嘅艾歷臣，喺《You’ll Never Walk Alone》嘅歌聲中圓夢，呢位76歲瑞典名帥表示：「我哭了！」

艾歷臣早前喺訪問表示，利物浦一直係佢最深愛球隊，執教生涯亦曾有一次好接近加盟「紅軍」，可惜最終未有成事。周六艾歷臣終於圓夢，同魯殊、班尼斯等一齊執教利物浦傳奇隊，陣容亦有謝拉特、費蘭度托利斯等名將，其中曾喺英格蘭國家隊同艾歷臣合作嘅謝拉特表示：「我知道艾歷臣執教，就趕返嚟希望為佢再效力多1次。」

利物浦喺半場落後0比2下，換邊後連入4球反勝4比2，入球者包括施斯、費蘭度托利斯等。賽前表示今仗好可能係佢人生最後一戰嘅艾歷臣表示：「我哭了！今仗會係我人生一個好重要嘅回憶，實在太美好，我忍唔住喊，執教利物浦令我夢想成真，今場所有人都係贏家。」