冇美斯甚麼都不是　邁亞密慘吞4蛋

周日(24日)早上美職賽事，喺「球王」美斯因傷缺陣下，國際邁亞密表現繼續係一盤散沙，最終作客慘吞紐約紅牛4蛋，賽後國際邁亞密教練馬天奴怒轟球員毫無鬥志嘅表現。

美斯因大腿筋傷患缺陣，不過國際邁亞密仍有蘇亞雷斯、佐迪艾巴同布斯基斯等名將壓陣，可惜球隊表現極差，上、下半場各失2球，而且為紅牛連中三元嘅蘇格蘭球星李維士摩根，更加係3年前被國際邁亞密班主碧咸踢走，今場倒戈大踢爭氣波。

國際邁亞密教練馬天奴賽後怒插球員：「除咗講紅牛由第1分鐘到90分鐘都踢得更好，我都冇乜好講。邁亞密球員唔單止冇爭勝嘅心，甚至連比賽嘅心都欠奉，完全預計唔到球隊會踢得咁差，所有人都要負上責任，我作客教練亦責無旁貸。」國際邁亞密周日(31日)朝早會對紐約城，消息指美斯好可能會繼續缺陣。