解放海倫功成身退　傳麥卡菲將離開曼聯

曼聯上季聘請南非名將麥卡菲出任前鋒教練，佢嘅工作一直受到好評，拉舒福特上季大爆發同海倫近期重生，據報麥卡菲功勞好大。呢位46歲名將早前暗示想正式執教後，消息指南非凱撒酋長有意搵佢坐正，麥卡菲隨時會離開曼聯。

曾效力阿積士、波圖、布力般流浪嘅麥卡菲，喺曼聯專責教導一眾攻擊球員，丹麥前鋒海倫日前透露：「麥卡菲同我哋幾個前鋒開會，一齊睇片研究邊度做得唔好、邊度需要加強，你可以見到我同隊友依家更加容易搵到大家。」

麥卡菲早前受訪曾表示想嘗試做主帥，網站《Soccer-Laduma》報道，南非勁旅凱撒酋長將麥卡菲列為新帥兩大目標之一，而佢對返南非執教亦持開放態度，尤其如果曼聯夏天炒坦哈格，整個教練團預計亦會被「開刀」，麥卡菲有好路會考慮「走先」。