皇馬7,500萬鎊搶阿諾特　利物浦有排煩

利物浦今夏面臨重建，早前聘請米高愛華士回巢做CEO、李察曉士又返嚟做總監，2大高層除咗要物色領隊高普繼任人之外，最近仲面臨挖角危機，據報皇家馬德里打算用7,500萬鎊(約7.5億港元)收購阿歷山大阿諾特。

英國《太陽報》報道，阿諾特同利物浦合約到2025年到期，續約一事仍未有結果，皇馬就準備趁火打劫，出動7,500萬鎊搶人。報道指利物浦並冇打算夏天出售阿諾特，但如果續約一直拖延，就要冒住明年畀佢自由轉會嘅風險。

25歲嘅阿諾特雖然踢右閘，但就以創造力同助攻力強見稱，皇馬視佢為丹尼爾卡華積嘅長遠接班人。利物浦今季喺阿諾特受傷期間，打起超級新人干拿巴特利，呢位20歲愛爾蘭新星近期穩坐正選席位，表現唔比阿諾特遜色。