曼聯重建英國軸心　馬古尼、麥湯有得留低

曼聯近2季進行大換血，不過成效認真麻麻，新老闆拉特克利夫上場後重新部署，據報打算重建「英國軸心」，季前被領隊坦哈格極力踢走嘅麥湯米尼同哈利馬古尼，將會成為重要成員，曼聯更準備提前啟動麥湯米尼續約條款。

曼聯上季開始主攻荷甲兵，但英國《太陽報》報道，拉特克利夫認為球隊需要有「本土班底」，麥湯米尼同哈利馬古尼2名幾乎被踢走嘅球員，成功用表現贏取信任。消息人士透露：「麥湯米尼扭轉佢嘅曼聯生涯，佢係曼聯今個慘痛球季僅有嘅光芒，仲開發埋喺中場嘅入球能力，佢同哈利馬古尼喺夏天已非常接近離隊，但佢哋依家被視為重要成員，新老闆希望投資喺英國球員身上。」

麥湯米尼同曼聯合約到2025年夏天完結，不過球會有權延長多1年，曼聯亦準備提前啟動條款，並打算向6萬鎊周薪嘅佢再開更長嘅新約。曼聯依家陣中英國球員都有唔少，包括拉舒福特、美臣蒙特、勞基梳爾、雲比沙卡同新入選英格蘭國家隊嘅馬恩奧，仲有北愛爾蘭嘅莊尼伊雲斯。