金玟哉不滿被杜曹冷落　國米趁機搶人

根據意大利《米蘭體育報》爆料，拜仁慕尼黑中堅金玟哉不滿上陣時間少，萌生去意，國際米蘭趁機出手，計劃今夏收購呢位27歲南韓國腳，意味金玟哉僅過1年，就可能重返意甲賽場。

拜仁慕尼黑上年夏天豪花5,800萬歐元(約4.9億港元)向拿玻里收購金玟哉，但一直未獲教練杜曹信任，近幾星期情況更加惡化，杜曹寧願派出1月由熱刺來投嘅艾歷迪亞擔任正選，都唔用金玟哉，甚至連「防線炸彈」烏柏美卡奴上陣機會都比「金仔」多，令佢意興闌珊，亦有傳拜仁打算今夏出售金玟哉。

據悉國際米蘭非常有興趣簽入金玟哉，因為隊內2位中堅法蘭斯高阿沙比、迪維積年齡漸高，其中36歲嘅法蘭斯高阿沙比近期捲入種族歧視事件，面臨被重罰，教練施蒙尼恩沙基希望今夏簽入中堅，金玟哉正值當打年齡，加上以往喺意甲有出色表現，無疑係最佳人選。問題係拜仁慕尼黑未必肯蝕錢出售金玟哉，財政欠佳嘅國米能否以5,800萬歐元收購「金仔」成為疑問。