安東尼大翻身　佢親自感謝1位隊友

安東尼馬菲奧斯自2022年夏天以8,600萬鎊(約8.5億港元)由阿積士加盟曼聯以來，表現一直飽受批評，其中今季30次上陣僅入2球，跌落谷底。不過，呢位24歲巴西翼鋒上場英足盃8強入波，協助球隊淘汰宿敵利物浦，成為大英雄，安東尼透露，喺呢段黑暗日子，多得隊友達洛治嘅全力支持，先至可以捱過難關。

安東尼馬菲奧斯接受曼聯官網訪問時話：「我好感謝神及1位隊友，就係達洛治，我同佢嘅友情非常深厚，佢每日都幫緊我，我哋經常互相鼓勵，只要保持耐性，就唔會被擊敗，我要感謝達洛治提供嘅意見，佢真係幫咗我好多。」

達洛治2018年由波圖轉投曼聯之後，亦曾經因為表現欠佳，不受重用，一度被外借去AC米蘭，但近2季憑出色狀態，已成為主力。呢位葡萄牙國腳過往嘅心路歷程同克服逆境嘅經驗，的確有助安東尼馬菲奧斯處理現時問題。