鋪定後路　連迪路夫考教練牌

曼聯後衞域陀連迪路夫表示，近日準備考取教練證書，為一旦結束球員生涯鋪定後路。

今夏將滿30歲嘅域陀連迪路夫指出，同幾位隊內好友參加教練培訓課程，目標係歐洲足協A級文憑，佢話：「依家只係剛起步，為將來做準備，冇人知將來會點，依家考好過掛靴後先去考，盡早學習，為將來有一日掛靴之後，都會有出路。」

瑞典國家隊領隊湯馬臣對域陀連迪路夫予以支持，認為球員應該及早為將來部署同規劃。

域陀連迪路夫2017年加盟曼聯至今已經7個球季，上陣257場入4球，期間「紅魔鬼」經歷動盪同多次換帥，今季喺坦哈格麾下試過客串左閘，雖然唔算係頂級後衞，但勝在平穩，而且識做人，主帥不斷更替佢都仍然屹立不倒。